Monday, August 2, 2010

ഹിന്ദു “തീവ്രവാദികള്‍“

ഇത്രയും കാലത്തിനിടക്ക് ഹിന്ദുക്കളുടെ പല തീവ്രവാദ നടപടികള്‍ക്കും ഞാന്‍ നിന്ന് കൊടുക്കേണ്ടി വന്നിട്ടുണ്ട്. അവയിലെ ചില അനുഭവങ്ങള്‍ ഇതാ..

രണ്ടാം ക്ലാസില്‍ പഠിക്കുമ്പോഴാണ് എന്റെ മാതാശ്രീ, പിതാശ്രീയും ആയിട്ടുള്ള അസ്വാരസ്യങ്ങള്‍ മൂലം തറവാട്ടിലേക്ക് തിരിച്ച് വന്നത്. പിന്നെ ആ തറവാട് തന്നെ മാതാശ്രീക്ക്, മാതാശ്രീയുടെ മറ്റ് മൂന്ന് സഹോദരങ്ങള്‍ വിട്ട് കൊടുക്കുകയും ഞങ്ങള്‍ അവിടെ താമസം ആക്കുകയും ചെയ്തത്. അന്ന് മാതാശ്രീ ജോലി ചെയ്തിരുന്നത് കുറച്ച് അകലെയുള്ള സ്‌കൂളിലായിരുന്നു.അത് കൊണ്ട് വീട്ടില്‍ നിന്ന് നേരത്തെ പോകുകയും ഏകദേശം ഇരുട്ട് വീഴുമ്പോഴാകും മാതാശ്രീ തിരിച്ച് വീട്ടില്‍ എത്തുന്നതും. പെങ്ങള്‍ക്ക് അന്ന് സ്കൂളില്‍ ചേര്‍ക്കാനുള്ള പ്രായം ആയിട്ടില്ല. 3 വയസ് ആകുന്നതേയുള്ളു. ആ സമയത്ത് മാതാശ്രീക്ക് ധൈര്യമായിട്ട് ജോലിക്ക് പോകാന്‍ സാധിച്ചിരുന്നത് തെക്കേതിലെ ചന്ദിരയമ്മ കാരണമായിരുന്നു. ചന്ദിരയമ്മയുടെ കൂടെയായിരുന്നു എന്റെ പെങ്ങള്‍ സ്‌കൂളില്‍ പോകുന്ന പ്രായം വരെ മാതാശ്രീ ജോലിക്ക് പോകുമ്പോള്‍ നിര്‍ത്തിയിരുന്നത്. അത് പോലെ, ഞാന്‍ സ്‌കൂളില്‍ നിന്ന് വരുമ്പോള്‍ എന്നെയും കാത്ത് കവലയില്‍ വന്ന് നില്‍ക്കും. അന്ന് വീടിന്റെ ഭാഗത്തേക്ക് വഴിയൊന്നുമുണ്ടായിരുന്നില്ല. സ്‌കൂള്‍ ബസ് നിര്‍ത്തിയിരുന്നത് കവലയിലായിരുന്നു. ഞാന്‍ വരുന്നതും നോക്കി കവലയില്‍ അമ്മ കാത്ത് നില്‍ക്കും. എന്നെയും കൂട്ടി കൊണ്ട് പോയി എന്റെ കൈയ്യും മുഖവും ഒക്കെ കഴുകിച്ചതിന് ശേഷം ഭക്ഷണം തരും. മിക്കപ്പോഴും ചോറ് തന്നെയാകും. അന്ന് അവരുടെ വീട്ടില്‍ അതേ ഉണ്ടാകാറുള്ളു. ചോറും പിന്നെ അച്ചാറും പിന്നെ എന്തെങ്കിലും പച്ചക്കറിയും. അതിന്റെ രുചി ഇപ്പോഴും എന്റെ നാവിലുണ്ട്. ഇപ്പോഴും ഇങ്ങ് അകലെ ഇരിക്കുമ്പോഴും ആ അമ്മയുടെ കൈപ്പുണ്യം ഞാന്‍ അറിയാറുണ്ട്. പല ടിന്നുകളായി ആ അമ്മ കൊടുത്ത് വിടുന്ന അച്ചാറുകളും, ചമ്മന്തിപ്പൊടികളും ഒക്കെ ആയിട്ട്. ഞങ്ങള്‍ ആ അമ്മയുടെ പേരക്കിടാങ്ങളാണ്. അന്നും, ഇന്നും, എപ്പോഴും.

ഏകദേശം 12-13 വയസ് വരെ രണ്ട് മാസം കൂടുമ്പോഴെങ്കിലും എനിക്ക് എന്തെങ്കിലും അസുഖം വരുന്നത് പതിവായിരുന്നു. മിക്കപ്പോഴും അത് ഛര്‍ദ്ദിയുടെ രൂപത്തില്‍, അല്ലെങ്കില്‍ ആസ്‌തമയുടെ രൂപത്തില്‍. മിക്കപ്പോഴും നട്ടപാതിരാക്ക് ആയിരിക്കും ഇതൊക്കെ അങ്ങ് വലിഞ്ഞ് കേറി അറ്റം മുട്ടുന്നത്. എന്റെ മാതാശ്രീ പിന്നെ വടക്കേതിലെ അമ്മയുടെ അടുത്തേക്ക് ഒരു ഓട്ടമാണ് വിവരം പറയാന്‍. അപ്പോഴേക്കും ഭാനുഅമ്മയും മക്കളും ഓടിയെത്തും. ഭാനുഅമ്മയുടെ രണ്ട് മക്കളില്‍ ഏതെങ്കിലും ഒരാളാകും എന്നെ കോരിയെടുത്ത് ഓടുന്നത്. പിന്നെ ഹോസ്പിറ്റലില്‍ എന്റെ മാതാശ്രീക്ക് കൂട്ടായിട്ട്, എന്തിനും വന്ന് നിന്നിരുന്നത് ഭാനുവമ്മയും മക്കളുമായിരുന്നു. അപ്പോഴും എന്റെ പെങ്ങള്‍ ചന്ദിരയമ്മയുടെ അടുത്ത് സുരക്ഷിതമായിട്ട് ഉണ്ടാകും. ഇപ്പോഴും ഭാനുഅമ്മക്ക് ഞാന്‍ എല്ലാ വെള്ളിയാഴ്ചയും ഫോണ്‍ ചെയ്‌തോളണം. പുള്ളിക്കാരിയുടെ കണക്കില്‍ ഗള്‍ഫ്കാര്‍ വിളിക്കുന്നത് വെള്ളിയാഴ്ചയാണത്രേ. എല്ലാ ദിവസവും ഭാനുഅമ്മ രാവിലെ തന്നെ വീട്ടിലെത്തും.ദിവസവും മാതാശ്രീയുടെ കൈ കൊണ്ട് ഉണ്ടാക്കിയ ചായ പുള്ളിക്കാരിക്ക് നിര്‍ബന്ധം.

കിഴക്കേലെ സുബ്രന്‍ അപ്പൂപ്പനും ഗൌരി അമ്മയും. വീട്ടിലെ ഒരു കാരണവരുടെ പോലെ മറ്റുള്ളവരുടെ മുന്നില്‍ നിന്ന് സംസാരിച്ചിരുന്നത് സുബ്രന്‍ അപ്പൂപ്പനായിരുന്നു. പറമ്പിലെ എല്ലാ കാര്യങ്ങളും നോക്കി നടത്തിയിരുന്നത് അപ്പൂപ്പന്‍ ആയിരുന്നു. പറമ്പിലെ തെങ്ങ് കയറ്റത്തിന്റെ മേല്‍നോട്ടം, വളമീടിക്കല്‍, കിളക്കല്‍, പറമ്പില്‍ വെള്ളമടിക്കല്‍, വീട്ടിലേക്ക് വേണ്ടുന്ന സാധങ്ങള്‍ വാങ്ങി കൊണ്ട് വരുന്നത് എല്ലാം സുബ്രന്‍ അപ്പൂപ്പനായിരുന്നു. ഒന്നിനും പുള്ളിക്കാരന്‍ ഒരു കണക്ക് പറയുന്നത് ഞാന്‍ കണ്ടിട്ടില്ല. ഒരിക്കല്‍ പറയുന്നത് ഞാന്‍ കേട്ടിട്ടുണ്ട് “സ്വന്തം മക്കളുടെ കാര്യങ്ങള്‍ നോക്കുന്നതിന് ആരെങ്കിലും പൈസ് വാങ്ങിക്ക്വോ?” എന്നാല്‍ മാതാശ്രീ കൊടുക്കുന്ന പൈസക്ക് വളരെ കിറുകൃത്യമായി പുള്ളിക്കാരന്റെ കൈയ്യില്‍ കണക്കുണ്ടാകും. ഗൌരിയമ്മയും ഒട്ടും മോശമല്ല. മൂത്ത മകള്‍ എന്ന രീതിയിലാണ് സുബ്രന്‍ അപ്പൂപ്പനും ഗൌരി അമ്മയും മാതാശ്രീയോടുള്ള അടുപ്പം. ഞാന്‍ ഇങ്ങോട്ട് പോരുന്ന അന്ന സുബ്രന്‍ അപ്പൂപ്പന്‍ എന്നെ കെട്ടിപിടിച്ച് പറഞ്ഞ കാര്യം ഇപ്പോഴും ഓര്‍മ്മയുണ്ട്. “മോനെ ഇനി കാണാന്‍ പറ്റ്വോന്ന് അപ്പൂപ്പന് അറിയൂല്ല. എല്ലാ ഐശ്വര്യങ്ങളും എന്റെ കുട്ടിക്ക് ഇണ്ടാവും” അത് ശരിയായിരുന്നു. എന്റെ ആദ്യത്തെ വെക്കേഷന് ചെല്ലുമ്പോ അപ്പൂപ്പന്‍ ഉണ്ടായിരുന്നില്ല. അല്ലെങ്കിലും നല്ല മനുഷ്യരുടെ മരണം പെട്ടന്നായിരിക്കും. അപ്പൂപ്പന്റെയും അത് പോലെ തന്നെ ആയിരുന്നു. ആര്‍ക്കും ഒരു ബുദ്ധിമുട്ടും വരുത്താതെ പുള്ളിക്കാരന്‍ പോയി.

പെങ്ങളുടെ കല്യാണം കഴിഞ്ഞതിന് ശേഷം, മാതാശ്രീ നാട്ടില്‍ ഒറ്റക്ക്. പക്ഷേ എനിക്ക് നാട്ടില്‍ ഒറ്റക്ക് നിര്‍ത്തിപ്പോരാനുള്ള ധൈര്യമുണ്ടായത് ഈ മൂന്ന് അമ്മമാരും അവരുടെ മക്കളും ഉണ്ടല്ലോ എന്ന ഒറ്റ ധൈര്യത്തിലാണ്. ഞാന്‍ എപ്പോള്‍ വീട്ടില്‍ വിളിക്കുമ്പോഴും ഇവരില്‍ ആരെങ്കിലും അവിടെ കാണും. അതുറപ്പാണ്. എനിക്ക് മൂന്ന് വെല്യുമ്മമാരുണ്ട് എന്നെനിക്ക് അഭിമാനത്തോടെ പറയാന്‍ കഴിയും. അവര്‍ തീവ്രവാദികളാണ്. സ്‌നേഹവും സാഹോദര്യവും ഐക്യവും നിലനില്‍ക്കണമെന്ന് അവര്‍ തീവ്രമായി തന്നെ വാദിക്കുന്നു. ആ കൂട്ടത്തില്‍ ഞാനും.

Monday, July 5, 2010

സ്‌നേഹപൂര്‍വ്വം മന്‍‌മോഹന്‍ അണ്ണന്

ഡിയര്‍ മിസ്റ്റര്‍ മന്‍‌മോഹന്‍ സിംഗ്,

എന്നൊക്കെ വിളിച്ച് അണ്ണനെ അങ്ങ് അഡ്രസ് ചെയ്യണംന്ന് ഒക്കേണ്ട്.. പക്ഷേ എന്റെ നാവ് അങ്ങട് വഴങ്ങണില്ല. അണ്ണാ..നമ്മള് ഒരു സാധാരണക്കാരനാണ്..അണ്ണനും അങ്ങനെ തന്നെയായിരുന്നല്ലോ..അല്ലേ? അപ്പ ഇങ്ങനെയൊക്കെ മതി.. തല്‍ക്കാലം അങ്ങട് ക്ഷമിക്ക്. നമ്മക്ക് ഈ കത്തെഴുത്ത് പരിപാടി അത്രക്ക് വശമില്ല. ലാസ്റ്റ് കത്തെഴുതിയത് പത്താം ക്ലാസില്‍ പഠിക്കുമ്പളായിരുന്ന്. അതിന് ശേഷം പിന്നെ ഈ വക പരിപാടിക്ക് വേണ്ടി നുമ്മക്ക് സമയം കളയേണ്ട അവസരം വീട്ട്കാര് ഉണ്ടാക്കി തന്നിട്ടില്ല.പിന്നയൊക്കെ ഈമെയില്‍ അല്ലേ..അത് അണ്ണന്‍ തുറന്ന് നോക്കുവോ എന്ന് വല്യ ഒറപ്പൊന്നുമില്ല. അതോണ്ടാണ് ഇപ്പ ഇങ്ങനെയൊന്ന് കുത്തി കുറിക്കുന്നത്. ഇത്രേം പറയുമ്പ അണ്ണന് അതിന്റെ ഒരു ഇത് മനസിലായിക്കാണുമല്ലോ ല്ലേ..

അപ്പ പറഞ്ഞ് വന്നത് അണ്ണന്‍ ക്യാനഡന്നോ മറ്റോ നമ്മട ഒബാമ അണ്ണനെ കണ്ട് വരുന്ന വഴിക്ക് ഒരു ഡയലോഗ് അങ്ങട് കാച്ചീല്ലേ? ഈ പെട്രോള്‍,ഡീസല്‍ വില വര്‍ദ്ധനവ് ഒരു കാരണവശാലും കുറക്കൂല്ലാന്ന്. അതും കഴിഞ്ഞ് ഇന്നലെ അണ്ണന്റെ ഗഡി പ്രണാബ് അണ്ണന്‍ ലത് ഉറപ്പിച്ച് പറയേം ചെയ്ത്. ലതിന്റെ ഗുട്ടന്‍സ് എനിക്ക് ഇപ്പഴും അങ്ങട് പിടികിട്ടീട്ടില്ലാ ട്ടാ.. അണ്ണന് അറിയാമല്ലോ. നുമ്മടെ വീട്ട്കാര് ഒക്കെ താമസിക്കണത് ലോ നമ്മടെ ഭാരതത്തിന്റെ ഒരു മൂലക്കുള്ള കേരളത്തിലാണെന്ന്.. അവ്ടെ നുമ്മളെ പോലെയുള്ള സാധാരണക്കാരന്റെ അടുപ്പ് പൊകയണമെങ്കില്‍ കണ്ട തമിഴന്റേയും കന്നടക്കാരന്റെയും തെലുങ്കന്റെയും ഒക്കെ കനിവ് വേണം അണ്ണാ.. അവരോട്ന്ന് ഒക്കെ വാങ്ങിച്ച് കൂട്ടണ അരി, പച്ചക്കറി, പാല്‍, പഴങ്ങള്‍, മാംസം എന്തിന് അടിയില്‍ ഇടുന്ന ജട്ടി വരെ ഇങ്ങ് കേരളത്തിലോട്ട് വരണമെങ്കില്‍ വെറ്തേ അവ്ടെന്ന് പറന്നൊന്നും വരൂല്ലാല്ലോ? ആകാശത്തുടെ ആയാലും കരയിലൂടെ ആയാലും ലത് ഇങ്ങോട്ട് കെട്ടിയെടുപ്പിക്കാന്‍ വാഹനം വേണം..ലതിന് ആ വാഹനത്തിന്റെ പള്ളയിലോട്ട് ഇപ്പ അണ്ണന്റെ സര്‍ക്കാറ് ഈയടുത്ത് വില കൂട്ടിയ ഡീസല്‍ എന്ന ഒരു സാധനം ഇടക്കിടെക്ക് നിറച്ച് കൊടുക്കണം. അപ്പ പറഞ്ഞ് വന്നത് ഡീസലിന്റെ വെല കൂടിയപ്പം പാണ്ടി ലോറി മൊയ്ലാളിമാര് ചാര്‍ജ്ജ് കൂട്ടി.. അപ്പ എന്ത് പറ്റി..മൊത്തം കച്ചോടക്കാരും സാധങ്ങള്‍ക്ക് അങ്ങട് വെലക്കൂട്ടി.. മൊത്തത്തീ പറഞ്ഞാല് കാര്യങ്ങളൊക്കെ കഷ്ട്ടമാണണ്ണാ..

അണ്ണനും പിന്നെ അണ്ണന്റെ കൂടെയുള്ള ഈ ഓയില്‍ മന്ത്രീം കൂടെ പറഞ്ഞ് പറഞ്ഞ് മനുഷ്യനെ വട്ടാക്കാന്‍ നോക്കണ കാര്യം, ക്രൂഡോയിലിന് വില കൂടി..പിടിച്ച് നിക്കാന്‍ പറ്റണില്ല. സബ്സിഡി ഒക്കെ കൊടുത്ത് സര്‍ക്കാര്‍ മുടിയും ന്ന് ഒക്കെ. അണ്ണാ.. ലതിന്റെ ഗുട്ടന്‍സ് എനിക്ക് അങ്ങട് ഇപ്പഴും കത്തണില്ല. അണ്ണാ ദാണ്ടെ താഴെ ക്രൂഡോയിലിന്റെ വെല നെലവാരം 2005 -2008 കൊല്ലങ്ങളിലെ വെലനിലവാരം എഴുതേണ്. ഒന്ന് നോക്ക് ട്ടാ..

ജൂണ്‍, 2005 - 60$/ബാരല്‍
ജൂലൈ,2006 - 77$/ബാരല്‍
ഡിസംബര്‍, 2006 - എകദേശം 63$/ബാരല്‍
സെപ്റ്റംബര്‍ 2007 - 80$/ബാരല്‍
ഒക്‍ടോബര്‍,2007 - 90$/ബാരല്‍
ജനുവരി 2, 2008 - 100$/ബാരല്‍
മാര്‍ച്ച് 12,2008 -110$/ബാരല്‍
മേയ് 9,2008 - 125$/ബാരല്‍
മേയ് 21,2008 - 130$/ബാരല്‍
ജൂണ്‍ 26,2008 - 140$/ബാരല്‍
ജൂലൈ 3,2008 -145$/ബാരല്‍
ജൂലൈ 11,2008 -147$/ബാരല്‍

ലോ മോളില് പറഞ്ഞത് 2005 മൊതലുള്ള ക്രൂഡോയിലിന്റെ വെല നിലവാരമാണ്..പക്ഷേ കണക്ക് അങ്ങട് ഒക്കണില്ലാല്ലോ അണ്ണാ.. ക്രൂഡോയിലിന്റെ വെല അനുസരിച്ച് അണ്ണന്‍ വിലക്കൂട്ടുംന്ന് പറഞ്ഞ്. ലോ 2007 ഒക്ടോബറില്‍ ബാരലിന് 90$ ഉണ്ടായിരുന്നപ്പം കേരളത്തില്‍ പെട്രോലിന് ലിറ്ററിന്‍ 48 ചില്ല്വാനം റുപ്യയും ഡീസലിന് 35 ചില്വാനം റുപ്യയും അല്ലേ അണ്ണാ ഉണ്ടായിരുന്നത്. ഇപ്പ ക്രൂഡോയിലിന് നുമ്മ ഈ കത്തെഴുതുമ്പം ഉള്ള വെല ബാരലിന് 72.64$. ഈ സമയത്ത് പെട്രോലിന്റെ വെല 54 ചില്വാനം റുപ്യയും ഡീസലിന്റെ വെല 41 ചില്വാനം റുപ്യയും. ഒരു ലോജിക്ക് ഇല്ലാല്ലോ അണ്ണാ. ആളുകളെ പറ്റിക്കുന്നതിന് ഒരു അതിരൊക്കെയില്ലേ?

ആ ക്രൂഡോയില്‍ വെല കത്തി നിക്കണ സമയത്ത് അണ്ണനും അണ്ണന്റെ മന്ത്രീം സബ്സിഡി കൊടുക്കണതിന്റെ അത്രേം വരുവോ അണ്ണാ ഇപ്പ കൊടുക്കേണ്ടി വരണത്? മനുഷ്യനെ വട്ടാക്കണതിലും ഒരു അതിരൊക്കെയില്ലേ അണ്ണാ? ആ പീക്ക് ടൈമില്‍ പോലും ഡീസലിനൊന്നും അണ്ണന്‍ ഇത്രേം വെല കൂട്ടിയില്ലല്ലോ.. ഓ ലത് മറന്നു.. അതിന്റെ പുറകെ ഇലക്ഷന്‍ വരുന്നുണ്ടായിരുന്നല്ലേ..അന്ന് അങ്ങിനെയങ്ങാനും ചെയ്തിരുന്നേ നാട്ട്കാര് പണി തരുംന്ന് ഓര്‍ത്തിട്ടല്ലേ അണ്ണന്‍ വളരെ സൈലന്റ് ആയി ഇരുന്നത്. ഇപ്പ അണ്ണന് “പണിയാന്‍“ ഇനീം ഇണ്ടല്ലാ ഇഷ്ട്ടം പോലെ സമയം. എനിക്കതല്ല അണ്ണാ സംശയം.. ഈ പെട്രോളിന്റെ വെലയിലുള്ള അണ്ണന്റെം അണ്ണന്റെ സര്‍ക്കാരിന്റെ അധികാരം എടുത്ത് മാറ്റി കൃത്യം ഒരാഴ്ച തെകച്ചില്ലാ..അതിന് മുമ്പേ ആ പാവപ്പെട്ട അംബാനി ചേട്ടന്റെ ഏതോ ഒരു പാടത്ത് എന്തോ എണ്ണശേഖരം കണ്ടെത്തീന്ന് പറയണത് ഒള്ളത് തന്നണ്ണാ? അതും ഇതായിട്ട് വല്ല ബന്ധോം ഉണ്ടോ അണ്ണാ?? നാട്ട്കാര് ഒരോന്നൊക്കെ പറഞ്ഞ് തുടങ്ങിയേ..അതോണ്ട് ചോദിക്കണതാ

അണ്ണാ.. ഇതിന്റെ കൂടെ എഴുതണംന്ന് വിചാരിച്ചതല്ല.. അണ്ണന്റെ വ്യോമയാന വകുപ്പ് ഞങ്ങള് പ്രവാസികള്‍ക്കിട്ട് ഡീസന്റായിട്ട് കുറച്ചൂസം മുമ്പ് ഒരു പാര വെച്ചു..അധികമൊന്നുമില്ല. ഇത്രേം കാലം ബിസിനസ് ക്ലാസില്‍ യാത്ര ചെയ്തിരുന്ന അണ്ണന്മാര്‍ കൊടുത്തിരുന്ന എന്തോ ഒരു സര്‍ച്ചാര്‍ജ്ജ് ഇനി എക്കോണമി ക്ലാസിലും യാത്ര ചെയ്തിരുന്നവരും കൊടുക്കണംന്ന്.. അത് ഇന്ത്യന്‍ വിമാനകമ്പനികള്‍ക്ക് മാത്രമല്ല.. വിദേശ വിമാനകമ്പനികളും കൊടുക്കണമെന്ന് പറഞ്ഞാല്‍ എന്ത് ചെയ്യും? അണ്ണാ.. ഇത് എന്ത് ചതിയാണണ്ണാ? അണ്ണന് അറിയാമ്പാടില്ലേ ഞങ്ങ പ്രവാസികള് നാട്ടിലോട്ട് ഇഷ്ട്ടം പോലെ പൈസ അയക്കണത്? എകദേശം കേരളത്തിലെ ബജറ്റിന്റെ അത്രേം പൈസ വരും ഒരു കൊല്ലം അണ്ണന്‍ ആന്‍ഡ് പാര്‍ട്ടീസ് കളിയാക്കി വിളിക്കണ ബ്ലഡി മല്ലൂസ് നാട്ടിലോട്ട് വിടുന്നത്. അണ്ണാ..നമ്മടെ കാര്യമൊക്കെ വിട്. നമ്മക്ക് ഈ പൈസയൊക്കെ അഡ്ജസ്റ്റ് ചെയ്ത് വിടാം. പക്ഷേ ഇവ്ടെ 800 റിയാലിനും 1200 റിയാലിനും ഇടക്ക് ജോലി ചെയ്യുന്ന കുറേ ബ്ലഡി മല്ലൂസ് ഇവ്ടെണ്ട്. നാട്ടിലെത്തുന്ന പൈസയുടെ മുക്കാല്‍ പങ്ക് എങ്കിലും ഈ ബ്ലഡി മല്ലൂസും കൂടാതെ കുറേ കൂതറ ബിഹാറികളും മറ്റും അയക്കണ പൈസയാണണ്ണാ.. അവര്‍ സ്വന്തം കുടുംബത്തെ കാണാന്‍ രണ്ടും മൂന്നും കൊല്ലം എടുത്ത് വരുവാന്‍ വേണ്ടി സ്വരുകൂട്ടി വെക്കുന്ന പൈസയില്‍ തന്നെ കൈയ്യിട്ട് വാരണോ അണ്ണാ? അല്ലേലും കൈയ്യിട്ട് വാരുന്ന സ്വഭാവം അണ്ണന്റെ കൂട്ടത്തില്‍ കുറേയെണ്ണത്തിനുണ്ടല്ലോ..അല്ലേ..ഇവരെയൊക്കെ നേരെയാക്കാനൊരു വഴീണ്ട്.

ഇതാണ് ഈ കൂട്ടര്‍ക്കുള്ള മരുന്ന്. നാട്ടീന്ന് വരുന്ന എയര്‍‌ഇന്ത്യാ എക്സ്പ്രസ് (ലതില്‍ തന്നെ വരണം അണ്ണാ‌) വിമാനത്തില്‍ കേറ്റി ഇങ്ങോട്ട് ഈ സമയത്ത് (ഈ ജൂണ്‍, ജൂലൈ, ആഗസ്റ്റ് മാസങ്ങളില്‍) കൊണ്ട് വന്നിട്ട് ഒരു കവറോളും ഇടീപ്പിച്ച് നേരെ ഇവ്ടെ വല്ല കണ്‍‌സ്ട്രക്ഷന്‍ സൈറ്റില്‍ വിടണം. എന്നിട്ട് വൈകീട്ട് ലേബര്‍ ബസുകളില്‍ ഏസിയിടാതെ എല്ലാത്തിനേം കേറ്റി തിരിച്ച് ലേബര്‍ ക്യാമ്പില്‍ കൊണ്ട് വിടണം. അണ്ണന്‍ ഇവിടുത്തെ ചില ലേബര്‍ ക്യാമ്പുകള്‍ കണ്ടിട്ടുണ്ടാ? നാട്ടിലെ ജയിലൊക്കെ എത്ര ഭേദമാ. എന്നിട്ട് അവസാനം, ഒരു രണ്ട് മാസം കഴിഞ്ഞ് തിരിച്ച് ഇതേ ചൂടത്ത് തന്നെ എയര്‍ഇന്ത്യാ എക്സ്‌പ്രസില്‍ തന്നെ ഒരു എട്ട് പത്ത് മണിക്കൂര്‍ ഫ്ലൈറ്റ് വൈകിപ്പിച്ച്, വിമാനത്തില്‍ ഏസിയിടാതെ അതില്‍ തന്നെ ഇരുത്തണം..എന്നിട്ടേ നാട്ടിലേക്ക് വിടാവൂ.. അതോടെ എല്ലാം പഠിച്ചോളും. വേണേല്‍ അണ്ണനും ഇതൊന്നു പരീക്ഷിക്കാം ട്ടാ.

അപ്പോ മോളില്‍ പറഞ്ഞ ആദ്യത്തെ കാര്യത്തിന് അണ്ണന്റെ ഒരു മറുപടി പ്രതീക്ഷിക്കുന്നു.. പ്രതീക്ഷ മാത്രേയുള്ളു. കൈയ്യും കെട്ടി വെച്ച് അണ്ണന്‍ മിണ്ടാതെ നടക്കൊള്ളൂന്ന് അറിയാം. എന്നാലും..വെറ്തേ..

അപ്പോ ഞാന്‍ നിര്‍ത്തേണ്‍..

സസ്നേഹം,
മെലോഡീ.

Thursday, February 25, 2010

പൂര്‍ണ്ണം

പഴയ പട ഫോള്‍ഡര്‍ നോക്കിയപ്പം കൊള്ളാമെന്ന് എനിക്ക് തോന്നിയത് കൊണ്ട് ഇവിടെ പൂശുന്നു.

Thursday, January 28, 2010

ഇരന്ന് വാങ്ങല്‍


രാജ്യം പ്രമുഖ വ്യക്തിത്വങ്ങള്‍ക്ക് നല്‍കുന്ന ബഹുമതിയായ പത്മ അവാര്‍ഡുകളുടെ വില കുറച്ച് കളയുന്നതായി എനിക്ക് ഇത് വായിച്ചപ്പോള്‍ തോന്നി. ബഹുമതി ചോദിച്ച് വാങ്ങിക്കാനും കുറച്ച് പേരും ഇറങ്ങിയിട്ടുണ്ട്. സ്വയം ചോദിച്ച് വാങ്ങുന്നതിനെ എങ്ങിനെയാ ബഹുമതി എന്ന് വിളിക്കുന്നത്? കഷ്ട്ടം !!

Wednesday, January 27, 2010

രാപ്പടം

Posted by Picasa
ഇതാണ് ഫനാര്‍. ദോഹയിലെ കോര്‍ണിഷില്‍
നിന്ന് എടുത്തത്. കൈയ്യില്‍ ട്രപ്പോഡും കോപ്പും ഒന്നും ഇല്ലായിരുന്നു. അതോണ്ട് ISO-1600ല്‍ വെച്ച് എടുത്തു. അത്യാവശ്യത്തില്‍ കൂടുതല്‍ നോയ്സ് ഒക്കെ ഉണ്ടാകും ;) ആദ്യായിട്ട് ബ്ലോഗില്‍ ഇടുന്ന പടമാണ് ഇത് ;)